Acts 20

1MORON lao dukedier, Paulus ap molipe pena tounpadak kan, ap kotin kamurimuri on irail o kotila, pwen sailokelan Masetonien. 2A lao kakan sili sap oko, o panapanaui irail kaualap, ap kotilan wein Krik. 3A lao kotikot wasa o saunipon silu, ap men kotilan Sirien, ari so, a kotin pure don Masetonien, pwe Sus oko masamasan i. 4A iet akan, me likid i lel Asien: Sopater nain Pirus men Peroa, a Aristarkus o Sekundus men Tesalonik, a Kaius men Derpe, o Timoteus, o Tikikus, o Tropimus men Asien. 5Mepukat tion mas ap aui kit nan Troas. 6Murin kamadip en prot somut se serok wei san Pilipi, tanatanki ran limau kokola re ’rail Troas, wasa se mimi ia ran isu. 7A ni ran kaieu en wik. ni at pokon pena, pwen pilitiki pena prot, Paulus ap kotin padaki on irail. A mandan ran o a pan samala. A kotin kawarailar a padak lao lel aslep en pon. 8A lamp toto mi nan kokon wasa se pokon pena ia. 9A manakap amen, me ad a Eutikus, me momod nan wanimtuk, me mair kalikala. A ni en Paulus a padak warai, i ari mair kalikala melel, ap pupedi san ni kasilu en kokon poa, o re pokada, a melar. 10A Paulus me kotidi kipedi on poa o polodi i masani: Komail der mauk, pwe a memaur! 11I lao kotidala o pilitiki pena prot., o konoter, o padapadak warai lao lel wasa ran, ap kotilar. 12A irail wado manakap me maur ap pereperen kaualap. 13A kit me madan ian sop o, tanatan kolan Asos, wasa se pan uk ia Paulus, pwe i me a kakalik on kit. A pein i pan sapal. 14A lao tu on kit nan Asos, se ap uk i, tanalan Mitelene. 15Kit tanatan kodo san wasa o manda se lel on likin Kios, o manda se lele don Samos, o se mondi Trokilion, a manda se pwara don Miletus. 16Pwe Paulus kileledier en dauli Episus, pwe a der pwapwand nan Asien, pwe a kotin karawaru, ma a pan kak, a pan lel on Ierusalem ni ran en Pentikos. 17A san Miletus a kotin ilakilan Episus molipe saunkoa en momodisou kan. 18Irail lao pwara don i, a kotin masani on irail: Komail asa duen ai wiawia re omail ansau karos san ni tapin ran o, me i lel Asien, 19Duen i papa Kaun o ni aktikitik, o sanesan, o kamekam nan pun en Sus oko, ni ar rukiruki ia di. 20O duen i sota oki saner meakot me katepan, pwe i kaireki komail karos, o padapadaki komail sansal o nan im akan. 21O i kadede on men Sus o pil men Krik kalula on Kot o poson atail Kaun Iesus Kristus. 22A kilan, i ap kokodalan Ierusalem, nen i salidi o i sasa, da me pan pid ia wasa o. 23A Nen saraui kin kotin kadede on ia nan kanim karos, me sal akan o kamekam kin auiaui ia. 24Ari so, i sota kin insenoki mepukat, i pil sota kasampwaleki maur i, pwe i en kaimwisokela ai koa dodok, me i aleer san ren Kaun Iesus, en kadede ronamau en mak en Kot. 25A kilan, i ap asaer, me komail karos, me i padapadaki oner wein Kot, pan solar udial mas ai. 26I me i kadede on komail ran wet, me i makelekel san ntan komail karos. 27Pwe i padaki on komail duen kupur en Kot, o sota man meakot me i okisan komail. 28Komail ari kalaka komail o momodisou karos wasa, me Nen saraui kotin kasapwil komail dan silepa ko, pwen apapwali momodisou en Kot me a kotin pwainiki pein nta. 29Pwe i asaer, me murin ai samalar kidi komad akai pan pwara don komail, me sota pan kasampwaleki pwin o. 30A ol akai pan uda san nan pein komail, me pan padak sapun, pwen wiaki tounpadak kan pein ar warok kan. 31Komail ari masamasan o tamanda, me i sota dukedi, panaui amen amen, sanesan ni ran ni pon saunpar silu. 32Ari, i pan mueid on komail Kot o masan en kupur a, me manaman on kapwai komail ada, o kotiki on komail soso eu ren me saraui kan. 33I sota noroke en amen a silper, de kold de likau. 34Pein komail asa, me pa i kat kin papa ia o ai warok kan. 35I kasale on komail er meakan duen komail en dodok, pwen sauasa me luet akan o tamatamanda masan en Kaun Iesus akan, duen a pein kotin masani: Kiki wei me kaperen san ale. 36A lao kotin masanier mepukat, a kelepuki ian irail karos kapakap. 37Irail ari sanesan kaualap o polodi tapin wor en Paulus o metik i. 38Re insensuedekier kaualap a masan, me dene re solar pan udial silan i. Irail ari likid i koti on pon sop o.